ឯកឧត្តម ឈុំ សុជាតិ អញ្ជើញធ្វើបទបង្ហាញពន្យល់អំពីការដោះស្រាយបញ្ញត្តិច្បាប់ទាក់ទងនឹងអ្នកសារព័ត៌មាន
(ភ្នំពេញ)៖ នៅរសៀលថ្ងៃចន្ទ ទី២៤ ខែកុម្ភៈ ឆ្នាំ២០២៦ នេះ នៅទីស្តីការ ក្រសួងព័ត៌មាន ឯកឧត្តម ឈុំ សុជាតិ រដ្ឋលេខាធិការ ក្រសួងព័ត៌មាន បានអញ្ជើញធ្វើបទបង្ហាញ និងពន្យល់លម្អិតអំពីការអនុវត្ត និងដំណោះស្រាយបញ្ញត្តិច្បាប់ទាក់ទងនឹងអ្នកសារព័ត៌មាន ដើម្បីលើកកម្ពស់ការយល់ដឹងផ្នែកច្បាប់ និងសុចរិតវិជ្ជាជីវៈសារព័ត៌មាន។
ក្នុងបទបង្ហាញនេះ ឯកឧត្តមបានលើកឡើងពីសារៈសំខាន់នៃ ច្បាប់ស្តីពីរបបសារព័ត៌មាន និងបញ្ញត្តិនានានៃ ក្រមព្រហ្មទណ្ឌកម្ពុជា ដែលពាក់ព័ន្ធនឹងការអនុវត្តវិជ្ជាជីវៈសារព័ត៌មាន ជាពិសេសបទប្បញ្ញត្តិទាក់ទងនឹងសិទ្ធិឯកជនភាពបុគ្គល ការទទួលខុសត្រូវចំពោះមាតិកាផ្សាយ និងការប្រព្រឹត្តអំពើដែលអាចជាបទល្មើសព្រហ្មទណ្ឌ។
ឯកឧត្តមបានបញ្ជាក់ថា សេរីភាពសារព័ត៌មាន គឺជាសិទ្ធិសំខាន់មួយក្នុងសង្គមប្រជាធិបតេយ្យ ប៉ុន្តែការអនុវត្តសិទ្ធិនេះត្រូវស្ថិតក្រោមក្របខណ្ឌច្បាប់ និងក្រមសីលធម៌វិជ្ជាជីវៈ។ អ្នកសារព័ត៌មានត្រូវមានការយល់ដឹងច្បាស់អំពីកាតព្វកិច្ច និងការទទួលខុសត្រូវរបស់ខ្លួន ដើម្បីជៀសវាងការបំពានលើសិទ្ធិបុគ្គល ឬការប្រព្រឹត្តអំពើដែលអាចនាំឲ្យមានទោសទណ្ឌកម្មតាមច្បាប់។
ជាមួយគ្នានេះ ឯកឧត្តមក៏បានលើកទឹកចិត្តដល់អ្នកសារព័ត៌មានទាំងអស់ បន្តពង្រឹងសមត្ថភាពវិជ្ជាជីវៈ ការពិនិត្យផ្ទៀងផ្ទាត់ព័ត៌មាន និងគោរពតាមបទប្បញ្ញត្តិច្បាប់ជាធរមាន ដើម្បីរួមចំណែកកសាងវិស័យព័ត៌មានឱ្យមានគុណភាព ទំនួលខុសត្រូវ និងទទួលបានការជឿទុកចិត្តពីសាធារណជន។
ការធ្វើបទបង្ហាញនេះ ត្រូវបានចាត់ទុកថា ជាឱកាសសំខាន់មួយក្នុងការពង្រឹងការយល់ដឹងផ្នែកច្បាប់ និងការអនុវត្តសារព័ត៌មានឱ្យស្របតាមគោលការណ៍នីតិរដ្ឋ និងវិជ្ជាជីវៈ។ដោយ ហុក វិបុល
