ប្រជាពលរដ្ឋតំបន់ផ្សារចិន ខណ្ឌចំការមន ស្នើអាជ្ញាធរចុះត្រួតពិនិត្យទីតាំងសង្ស័យល្បែងស៊ីសងខុសច្បាប់
ភ្នំពេញ៖ ចេញផ្សាយថ្ងៃទី ៩ ខែមករា ឆ្នាំ ២០២៦ — ប្រជាពលរដ្ឋរស់នៅក្នុងតំបន់ផ្សារចិន ខណ្ឌចំការមន កំពុងបង្ហាញការព្រួយបារម្ភយ៉ាងខ្លាំង និងសូមគោរពស្នើសុំដល់អាជ្ញាធរមានសមត្ថកិច្ច មេត្តាចុះត្រួតពិនិត្យចំពោះសកម្មភាពល្បែងស៊ីសងខុសច្បាប់ ដែលត្រូវបានរាយការណ៍ថា មានបើកលេងជាច្រើនកន្លែង ដោយគ្មានការគោរពច្បាប់ និងសណ្តាប់ធ្នាប់សង្គម។
តាមរូបភាពដែលទទួលបាន បង្ហាញឲ្យឃើញអគារពាណិជ្ជកម្មមួយកន្លែង ស្ថិតនៅក្នុងតំបន់ផ្សារចិន ខណ្ឌចំការមន ដែលមានស្លាកអក្សរភាសាចិន និងភាសាខ្មែរ បង្ហាញពីអាជីវកម្មជាច្រើនប្រភេទ។ ទោះជាស្លាកខាងមុខបង្ហាញថាជាអាជីវកម្មសេវាកម្ម ឬកន្លែងកម្សាន្តក្តី ប៉ុន្តែប្រជាពលរដ្ឋក្នុងមូលដ្ឋានបានអះអាងថា នៅខាងក្នុងតំបន់នេះ ត្រូវបានសង្ស័យថាមានសកម្មភាពល្បែងស៊ីសងខុសច្បាប់ កំពុងដំណើរការជាប្រចាំ។
ប្រជាពលរដ្ឋបានលើកឡើងថា សកម្មភាពទាំងនេះ មិនត្រឹមតែបង្កការរំខានដល់ជីវភាពរស់នៅប្រចាំថ្ងៃប៉ុណ្ណោះទេ ប៉ុន្តែថែមទាំងប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់សង្គមក្នុងមូលដ្ឋានផងដែរ។
ក្នុងន័យនេះ ប្រជាពលរដ្ឋសូមគោរពស្នើសុំដល់ លោកអភិបាលខណ្ឌចំការមន និងអាជ្ញាធរមានសមត្ថកិច្ចពាក់ព័ន្ធ មេត្តាចុះត្រួតពិនិត្យស្រាវជ្រាវជាក់ស្តែង និងចាត់វិធានការតាមច្បាប់ឲ្យបានម៉ឺងម៉ាត់ ប្រសិនបើរកឃើញការល្មើស ដើម្បីទប់ស្កាត់សកម្មភាពល្មើសច្បាប់ទាំងនេះ។
ប្រជាពលរដ្ឋក៏បានបង្ហាញក្តីសង្ឃឹមថា ការអន្តរាគមន៍ទាន់ពេលវេលារបស់អាជ្ញាធរ នឹងជួយរក្សាសុខសន្តិភាព សុវត្ថិភាព និងសណ្តាប់ធ្នាប់សង្គម ជូនប្រជាពលរដ្ឋក្នុងតំបន់ឲ្យបានល្អប្រសើរឡើងវិញ។