ខេត្តសៀមរាប៖ អាជ្ញាធរមានសមត្ថកិច្ចច្រើនស្ថាប័នណាស់ ដែលមានសិទ្ធិក្នុងការបង្ក្រាបទល្មើសនៃការនាំលៀសទៅប្រទេសវៀតណាម។ បើនិយាយពីសមត្ថកិច្ចជំនាញរដ្ឋបាលជលផលវិញគឺមានច្រើនស្អេកស្កះចាប់ពីនៅក្នុងទឹកបឹងទន្លេសាប រហូតដល់លើគោកនិងនៅច្រកទ្វារព្រំដែន មុនចេញទៅប្រទេសវៀតណាម។ បច្ចុប្បន្ននេះក្រៅពីសមត្ថកិច្ចជំនាញរដ្ឋបាលជលផលក៏នៅមាននគរបាលសេដ្ឋកិច្ចនិងជាពិសេសកម្លាំងយោធាដែលត្រូវបានសម្តេចនាយករដ្ឋមន្ត្រី ចាត់តាំងកម្លាំងឲ្យចាំបង្ក្រាបបទល្មើសនេសាទនៅបឹងទន្លេសាបនោះទៀតផង។

ប៉ុន្តែគេកត់សម្គាល់ឃើញថា បទល្មើសនៃការនេសាទលៀសនៅលើផ្ទៃបឹងទន្លេសាប នៅតែកើតមានហើយការនាំលៀសចេញទៅក្រៅប្រទេសក៏នៅតែដំណើរការជាធម្មតា។បើទោះបីជា សមត្ថកិច្ចយោធា,នគរបាល ប្រឹងដុតដៃដុតជើងបង្ក្រាបជាញឹកញាប់ក៏ដោយ។ ពួកឈ្មួញ តែប៉ុន្មាននាក់ប៉ុណ្ណោះ ដែលធ្វើសកម្មភាពកំពុងក្រឡុកផ្ទៃបឹងទន្លេសាបដើម្បីប្រមូលនាំលៀសចេញទៅប្រទេសវៀតណាម។ ហេតុអ្វីបានជាអាជ្ញាធរមានសមត្ថកិច្ច មិនកាត់ផ្ដាច់ឬសគល់ឈ្មួញទាំងប៉ុន្មាននាក់នោះ ?

យ៉ាងហោចណាស់ឈ្មួញល្បីឈ្មោះបីនាក់ ដែលកំពុងធ្វើសកម្មភាពនាំលៀសចេញ ទៅប្រទេសវៀតណាមសព្វថ្ងៃ។ បើទោះបីជាសមត្ថកិច្ច ចាប់ផាកពិន័យច្រើន លើកច្រើនសារហើយក៏ដោយ ក៏ពួកគេនៅតែបន្តធ្វើ សកម្មភាពដដែល។ ពលរដ្ឋនៅតំបន់បឹងទន្លេសាបក្នុងខេត្តសៀមរាប,កំពង់ធំ,កំពង់ឆ្នាំង និងពោធិ៍សាត់ មានចម្ងល់ថា ហេតុអ្វីបានជាស្ថាប័នជំនាញក៏ដូចជាកង យោធពលខេមរភូមិន្ទ មិនកាត់ផ្ដាច់ឬសគល់នៃពពួកបំផ្លាញធនធានធម្មជាតិអេកូឡូស៊ីនេះ។

បុគ្គលល្បីឈ្មោះមួយរូបដែលអាចចាត់ទុកថាជាមេខ្លោងធំឈ្មោះឡេ យ៉ាំងហៀប រស់នៅក្នុងស្រុកក្រគរ ខេត្ត ពោធិ៍សាត់ ជាអ្នកមានទ្រព្យធន់និងជាស្ថាបនិកក្នុងការនាំលៀសទៅប្រទេសវៀតណាម,លោកខ្យង រស់នៅក្នុងស្រុកបរិបូណ៌ខេត្តកំពង់ឆ្នាំង ជាគូរកនរបស់លោកហៀប ដែលលោកខ្យងមានរថយន្តធុនធំសម្រាប់ដឹកលៀសទៅប្រទេសវៀតណាមនិងលោកប៉ូច ហៅពៅ នៅស្រុកក្រគរខេត្តពោធិ៍សាត់ ជាអ្នកមានរថយន្តសាំយ៉ុង សម្រាប់ដឹកលៀសទៅប្រទេសវៀតណាមនិងក៏ជាអ្នករត់ការតាមដង ផ្លូវដ៏ចំណានផងដែរ។ បុរសខ្មែរ,វៀតណាមទាំង៣នាក់ខាងលើនេះ ត្រូវបានសមត្ថកិច្ចចាប់បង្ក្រាបជាញយដងមកហើយក្នុងការនាំលៀសទៅប្រទេសវៀតណាមដោយខុសច្បាប់។ ប៉ុន្តែហាក់ដូចមិនរាងចាលសោះ។

ពួកគេភាគច្រើននាំលៀសចេញតាមច្រកព្រំដែន នៅក្នុងភូមិសាស្ត្រខេត្តត្បូងឃ្មុំ និងខេត្តស្វាយរៀង។ ពលរដ្ឋអ្នកនេសាទនិយាយថា បើអាជ្ញាធរមានសមត្ថកិច្ចមិនចាត់វិធានការទាន់ពេលវេលាទេ នោះធនធានធម្មជាតិអេកូឡូស៊ីនៅក្នុងបឹងទន្លេសាបនឹងត្រូវរលាយហិនហោចឆាប់ៗ។ លៀសល្អិតទាំងនេះ ត្រូវបាននាំទៅប្រទេសវៀតណាមសម្រាប់កិនធ្វើជាចំណីបង្កង៕