លោកឧត្តមសេនីយ៍ឯក រ័ត្ន ស្រ៊ាង ដឹកនាំកងរាជអាវុធហត្ថរាជធានីភ្នំពេញ ចូលរួមប្រជុំផ្សព្វផ្សាយផែនការស្វ័យត្រួតពិនិត្យចំនួនទ័ព និងនីតិវិធីដាក់យោធិនឱ្យចូលសោធននិវត្តន៍

(រាជធានីភ្នំពេញ)៖ នារសៀលថ្ងៃទី២៩ ខែមេសា ឆ្នាំ២០២៦ នៅបញ្ជាការដ្ឋានកងរាជអាវុធហត្ថរាជធានីភ្នំពេញ លោកឧត្ដមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ បានដឹកនាំមន្ត្រីអាវុធហត្ថក្រោមឱវាទ រួមមាន លោកមេបញ្ជាការរង, ប្រធានមន្ទីរទាំង៧, នាយការិយាល័យជំនាញ, មេបញ្ជាការវរសេនាតូចអាវុធហត្ថចល័ត ព្រមទាំងមេបញ្ជាការមូលដ្ឋានអាវុធហត្ថខណ្ឌទាំង១៤ ចូលរួមក្នុងកិច្ចប្រជុំផ្សព្វផ្សាយផែនការសំខាន់ៗរបស់បញ្ជាការដ្ឋានកងរាជអាវុធហត្ថលើផ្ទៃប្រទេស។

កិច្ចប្រជុំនេះបានប្រព្រឹត្តទៅតាមរយៈប្រព័ន្ធវីដេអូ (Video Conference) ក្រោមអធិបតីភាពដ៏ខ្ពង់ខ្ពស់របស់ លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស។

របៀបវារៈសំខាន់ៗនៃកិច្ចប្រជុំនេះ រួមមាន៖

១. ការផ្សព្វផ្សាយផែនការស្វ័យត្រួតពិនិត្យចំនួនទ័ព និងកូនទ័ព ដើម្បីពង្រឹងការគ្រប់គ្រងកម្លាំងឱ្យបានច្បាស់លាស់។

២. ការណែនាំអំពីនីតិវិធីនៃការដាក់យោធិន នៃកងរាជអាវុធហត្ថឱ្យចូលសោធននិវត្តន៍ ស្របតាមគោលការណ៍កំណត់។

នេះជាផ្នែកមួយនៃកិច្ចការងាររដ្ឋបាល និងការគ្រប់គ្រងធនធានមនុស្សក្នុងជួរកងរាជអាវុធហត្ថ ដើម្បីធានានូវតម្លាភាព សុក្រឹតភាព និងប្រសិទ្ធភាពក្នុងការបំពេញភារកិច្ចជូនជាតិ និងប្រជាពលរដ្ឋ៕