ទិដ្ឋភាពដង្ហែក្បួន «នគរសង្ក្រាន្ត ២០២៦» នៅចតុមុខ ពោរពេញដោយភាពរីករាយ និងសាមគ្គីភាព
(ភ្នំពេញ)៖ នៅល្ងាចថ្ងៃទី១៥ ខែមេសា ឆ្នាំ២០២៦ ដែលជាថ្ងៃទី២ នៃពិធីបុណ្យចូលឆ្នាំថ្មីប្រពៃណីជាតិខ្មែរ បរិវេណផ្លូវថ្មើរជើងចតុមុខ រាជធានីភ្នំពេញ បានប្រារព្ធពិធីដង្ហែក្បួន «នគរសង្ក្រាន្ត ២០២៦» យ៉ាងអធិកអធម និងពោរពេញដោយបរិយាកាសសប្បាយរីករាយ។ពិធីនេះ មានការដឹកនាំដោយ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) រួមជាមួយ ឯកឧត្តម ឃួង ស្រេង អភិបាលរាជធានីភ្នំពេញ ដោយមានយុវជន និងប្រជាពលរដ្ឋចូលរួមយ៉ាងច្រើនកុះករ។ក្បួនដង្ហែមានឈ្មោះថា «សន្ធិការ» ដែលមានន័យថា “ការផ្សារភ្ជាប់” បង្ហាញពីការរួបរួមជាតិ មនោសញ្ចេតនាបងប្អូនក្នុងមហាគ្រួសារខ្មែរ ទាំងនៅក្នុង និងក្រៅប្រទេស ព្រមទាំងជាការអំពាវនាវឲ្យប្រជាជនខ្មែរទូទាំងពិភពលោក ត្រឡប់មកលេងប្រទេសកំណើត និងទាក់ទាញភ្ញៀវទេសចរអន្តរជាតិមកទស្សនាកម្ពុជា។
