សមាគម MSJ ចាត់តាំងសមាជិក ១០ រូប ចូលរួមវគ្គបណ្តុះបណ្តាលស្តីពីការអនុវត្តច្បាប់ និងវិជ្ជាជីវៈសារព័ត៌មាន នៅក្រសួងព័ត៌មាន

សមាគម MSJ ចាត់តាំងសមាជិក ១០ រូប ចូលរួមវគ្គបណ្តុះបណ្តាលស្តីពីការអនុវត្តច្បាប់ និងវិជ្ជាជីវៈសារព័ត៌មាន នៅក្រសួងព័ត៌មាន
[ភ្នំពេញ]៖ ឯកឧត្តម ម៉េង សោភណ្ឌ ប្រធានសមាគម អឹម អេស ជេរ៍ (MSJ) បានសម្រេចចាត់តាំងសមាជិកសមាគមដែលជាថ្នាក់ដឹកនាំអង្គភាពសារព័ត៌មានចំនួន ១០ រូប ដើម្បីចូលរួមក្នុងវគ្គបណ្តុះបណ្តាលដ៏មានសារៈសំខាន់ស្តីពី «ការលើកកម្ពស់ការអនុវត្តច្បាប់ និងលិខិតបទដ្ឋានគតិយុត្តសម្រាប់អ្នកសារព័ត៌មាន»។
វគ្គបណ្តុះបណ្តាលនេះ ប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី ២៣ ដល់ថ្ងៃទី ២៥ ខែកុម្ភៈ ឆ្នាំ២០២៦ នៅសាលរចតុម្មុខមង្គល ទីស្តីការក្រសួងព័ត៌មាន។
សមាសភាពថ្នាក់ដឹកនាំដែលត្រូវបានចាត់តាំង រួមមាន៖
យោងតាមសេចក្តីសម្រេច សមាសភាពដែលត្រូវចូលរួមក្រេបជញ្ជក់ចំណេះដឹងនាឱកាសនេះ រួមមាន៖ ១. លោក មាស សាម៉ុន ចាងហ្វាង ៧មករាញូស៍ ២. លោក ប៉ុល ដារ៉ូ និពន្ធនាយក ៧មករាញូស៍ ៣. លោក មឿន រស្មី ចាងហ្វាង រស្មីញូស៍ ៤. លោក រុន សារ៉េត ចាងហ្វាង អភិវឌ្ឍន៍កម្ពុជា ៥. លោក ហុក វិបុល ចាងហ្វាង ពន្លឺព្រះធម៌ ៦. លោក សំ សារឿន ចាងហ្វាងអង្គភាពសារព័ត៌មាន ៧. លោក ប៉ម មេសាង ចាងហ្វាងអង្គភាពសារព័ត៌មាន (រួមទាំងសមាជិកផ្សេងទៀត សរុបចំនួន ១០ រូប)។
ខ្លឹមសារសំខាន់ៗនៃវគ្គបណ្តុះបណ្តាល
កម្មវិធីសិក្សានេះត្រូវបានរៀបចំឡើងយ៉ាងសម្រិតសម្រាំង ដោយផ្តោតលើមាតិកាគ្រឹះ និងបច្ចុប្បន្នភាពនៃវិស័យព័ត៌មាន រួមមាន៖
ប្រវត្តិសាស្ត្រ៖ ការឈ្វេងយល់ពីឫសគល់នៃសារព័ត៌មាននៅកម្ពុជា តាំងពីសម័យអាណានិគម និងកាសែតភាសាខ្មែរដំបូងគេ “នគរវត្ត” (ឆ្នាំ១៩៣៦) រហូតដល់ការវិវត្តនៃប្រព័ន្ធផ្សព្វផ្សាយសកល។
បច្ចេកទេស និងយុទ្ធសាស្ត្រ៖ របៀបប្រមូលព័ត៌មាន ជំនាញសរសេរ និងការប្រើប្រាស់ផែនការឃោសនាដើម្បីយុទ្ធសាស្ត្រអភិវឌ្ឍន៍ជាតិ។
ទិដ្ឋភាពច្បាប់៖ ការអនុវត្តច្បាប់សកល និងច្បាប់ជាតិ ជាពិសេសសេចក្តីណែនាំថ្មី (ថ្ងៃទី១ ខែសីហា ឆ្នាំ២០២៥) ស្តីពីការផ្សព្វផ្សាយព័ត៌មានដែលពាក់ព័ន្ធនឹងសន្តិសុខជាតិ។
ក្រមសីលធម៌ និងទំនួលខុសត្រូវ៖ ការពង្រឹងធម្មនុញ្ញវិជ្ជាជីវៈ “ពិត ត្រឹមត្រូវ ស្មោះត្រង់ យុត្តិធម៌” និងការយល់ដឹងពីទំនួលខុសត្រូវចំពោះសង្គម រដ្ឋប្បវេណី និងព្រហ្មទណ្ឌ ស្របតាមសុភាសិតបុរាណថា «ចេះច្បាប់មិនខ្លាចក្ដី ចេះវិន័យមិនខ្លាចអាបត្តិ»។
ទិសដៅ និងការប្តេជ្ញាចិត្តរបស់សមាគម MSJ
ការបញ្ជូនសមាជិកឱ្យចូលរួមវគ្គបណ្តុះបណ្តាលនេះ គឺធ្វើឡើងក្នុងគោលបំណងលើកកម្ពស់សមត្ថភាពវិជ្ជាជីវៈ បង្កើនការយល់ដឹងផ្នែកច្បាប់ និងពង្រឹងសីលធម៌អ្នកសារព័ត៌មានឱ្យកាន់តែមានគុណភាព និងប្រសិទ្ធភាពខ្ពស់។
សមាគម អឹម អេស ជេរ៍ (MSJ) នៅតែបន្តអះអាងពីជំហរគាំទ្រយ៉ាងពេញទំហឹងចំពោះការអភិវឌ្ឍ “មូលធនមនុស្ស” ក្នុងវិស័យព័ត៌មាន ដើម្បីរួមចំណែកកសាងសង្គមកម្ពុជាឱ្យកាន់តែរីកចម្រើន ស្របតាមបរិបទនៃសម័យកាលឌីជីថល៕
ដោយ៖ ហុក វិបុល