លោកវេជ្ជបណ្ឌិត និន ចន្ថា៖ ការយល់ដឹងពីការសង្គ្រោះបឋម គឺជាកាតព្វកិច្ចរបស់ពលរដ្ឋគ្រប់រូប ដើម្បីជួយសង្គ្រោះជីវិតមនុស្ស
ភ្នំពេញ៖ «ការយល់ដឹងអំពីបច្ចេកទេសសង្គ្រោះបឋម មិនមែនជាការទទួលខុសត្រូវរបស់តែបុគ្គលិកសុខាភិបាលនោះទេ ប៉ុន្តែវាគឺជាកាតព្វកិច្ច និងជាជំនាញចាំបាច់សម្រាប់ប្រជាពលរដ្ឋគ្រប់រូប ដើម្បីអាចជួយសង្គ្រោះជីវិតអ្នកដទៃ ឬសមាជិកគ្រួសារបានទាន់ពេលវេលា»។ នេះគឺជាការលើកឡើងរបស់ លោកវេជ្ជបណ្ឌិត និន ចន្ថា ប្រធានផ្នែកគ្រប់គ្រងរថយន្តសង្គ្រោះបន្ទាន់នៃមន្ទីរពេទ្យមិត្តភាពខ្មែរ-សូវៀត។
ការលើកឡើងនេះ បានធ្វើឡើងក្នុងវគ្គបណ្តុះបណ្តាលពិសេសស្តីពី «ការសង្គ្រោះបឋមដល់ជនរងគ្រោះ ឬអ្នកជំងឺភ្លាមៗ» កាលពីព្រឹកថ្ងៃទី៥ ខែកុម្ភៈ ឆ្នាំ២០២៦ ដែលរៀបចំដោយក្លិបអ្នកកាសែតកម្ពុជា (ក.អ.ក) សហការជាមួយក្រសួងសុខាភិបាល និងផ្ទះយុវជនដើម្បីមិត្តភាពកម្ពុជា-ចិន ដោយមានអ្នកសារព័ត៌មានចូលរួមចំនួន ៨៣នាក់ មកពី ៥៣ស្ថាប័ន។
ក្នុងឱកាសនោះ លោកវេជ្ជបណ្ឌិត និន ចន្ថា បានពន្យល់យ៉ាងលម្អិតនូវចំណុចគន្លឹះចំនួន ៤ ដើម្បីក្លាយជាអ្នកសង្គ្រោះបឋមដ៏ប្រសើរ៖
១. និយមន័យនៃការសង្គ្រោះបឋម 🚑: គឺជាជំនួយដំបូងបំផុតដែលផ្តល់ឱ្យអ្នករងគ្រោះភ្លាមៗនៅកន្លែងកើតហេតុ ដើម្បីរក្សាជីវិត កាត់បន្ថយភាពធ្ងន់ធ្ងរនៃរបួស និងការពារកុំឱ្យស្ថានភាពជំងឺកាន់តែអាក្រក់ទៅៗ មុនពេលបញ្ជូនទៅមន្ទីរពេទ្យ។
២. ការគ្រប់គ្រងសុវត្ថិភាព 🛡️: គឺជាជំហានដំបូង និងសំខាន់បំផុត។ អ្នកជួយសង្គ្រោះត្រូវធានាសុវត្ថិភាពខ្លួនឯង អ្នករងគ្រោះ និងអ្នកជុំវិញខ្លួនជាមុនសិន។ ត្រូវពិនិត្យហានិភ័យដូចជា អគ្គិភ័យ ខ្សែភ្លើង ឬចរាចរណ៍ និងប្រើប្រាស់ឧបករណ៍ការពារដូចជាស្រោមដៃ ដើម្បីបង្ការការឆ្លងមេរោគ។
៣. ការសង្កេត និងការដកដង្ហើម 🌬️: ត្រូវវាយតម្លៃសភាពដឹងខ្លួនរបស់អ្នករងគ្រោះដោយការហៅ ឬប៉ះស្រាលៗ និងពិនិត្យមើលចលនាទ្រូង ឬស្តាប់សម្លេងដកដង្ហើម។ ប្រសិនបើមិនដកដង្ហើម ត្រូវអនុវត្តវិធីសង្គ្រោះបន្ទាន់តាមបច្ចេកទេសសុខាភិបាលភ្លាមៗ។
៤. ការវាយតម្លៃ និងការអនុវត្តចំពោះអ្នករបួស 🩺: មុននឹងជួយ ត្រូវវាយតម្លៃប្រភេទរបួស (ដូចជាការបាក់ឆ្អឹង ឬហូរឈាមខ្លាំង) ដើម្បីជ្រើសរើសវិធីសង្គ្រោះឱ្យបានត្រឹមត្រូវ ចៀសវាងការផ្លាស់ទីអ្នកជំងឺខុសបច្ចេកទេស ដែលអាចបណ្តាលឱ្យគ្រោះថ្នាក់កាន់តែធ្ងន់ធ្ងរ។
ជាមួយគ្នានេះដែរ លោក ពុយ គា ប្រធានក្លិបអ្នកកាសែតកម្ពុជា បានបញ្ជាក់ថា វគ្គបណ្តុះបណ្តាលនេះពិតជាមានសារៈសំខាន់សម្រាប់អ្នកសារព័ត៌មាន ព្រោះពួកគេតែងតែមានវត្តមាននៅកន្លែងកើតហេតុមុនគេ។ លោកបន្ថែមថា ទោះបីអ្នកសារព័ត៌មានមិនមែនជាគ្រូពេទ្យ ប៉ុន្តែចំណេះដឹងសង្គ្រោះបឋមនេះ គឺជាស្ពានចម្លងជីវិតជនរងគ្រោះឱ្យមានសង្ឃឹមរស់ រហូតដល់ក្រុមគ្រូពេទ្យជំនាញមកដល់៕ដោយ ហុក វិបុល
