ឯកឧត្តមរដ្ឋមន្ត្រី នេត្រ ភក្ត្រា ជំរុញឱ្យស្ថានីយវិទ្យុ FM ឯកជន បង្កើនគុណភាពខ្លឹមសារ ដើម្បីដណ្តើមភាពជឿជាក់ក្នុងយុគសម័យឌីជីថល
(ភ្នំពេញ)៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានផ្តល់ការណែនាំ និងលើកទឹកចិត្តដល់ម្ចាស់ស្ថានីយវិទ្យុ FM ឯកជនទាំងអស់ ឱ្យយកចិត្តទុកដាក់ពង្រឹងគុណភាពខ្លឹមសារ និងផលិតកម្មវិធីឱ្យកាន់តែសម្បូរបែប ប្រកបដោយភាពច្នៃប្រឌិត និងសុវត្ថិភាពព័ត៌មាន ដើម្បីទាក់ទាញទស្សនិកជន ក្នុងបរិបទនៃការរីកចម្រើនយ៉ាងរហ័សនៃប្រព័ន្ធផ្សព្វផ្សាយទំនើប។
ការលើកឡើងនេះ បានធ្វើឡើងក្នុងឱកាសដែលឯកឧត្តមរដ្ឋមន្ត្រី អនុញ្ញាតឱ្យតំណាងស្ថានីយវិទ្យុ FM ឯកជន ចូលជួបសម្តែងការគួរសម និងសំណេះសំណាលនាព្រឹកថ្ងៃទី២ ខែមេសា ឆ្នាំ២០២៦នេះ។
ក្នុងជំនួបនោះ ឯកឧត្តមរដ្ឋមន្ត្រីបានគូសបញ្ជាក់ពីបញ្ហាប្រឈមនៃប្រព័ន្ធផ្សព្វផ្សាយបុរាណ (Traditional Media) ដែលកំពុងរងសម្ពាធពីការធ្លាក់ចុះនៃចំណូលផ្សព្វផ្សាយពាណិជ្ជកម្ម ដោយសារការហូរចូលនៃបច្ចេកវិទ្យាឌីជីថល។ លោកបញ្ជាក់ថា នេះជាបាតុភូតសកលដែលតម្រូវឱ្យភ្នាក់ងារផ្សព្វផ្សាយត្រូវចេះបត់បែនតាមឥរិយាបថរបស់អ្នកទទួលព័ត៌មាន ដែលបច្ចុប្បន្នភាគច្រើនបានងាកទៅរកបណ្តាញសង្គមដូចជា Facebook, TikTok និង YouTube។
ទោះជាយ៉ាងណា ឯកឧត្តមរដ្ឋមន្ត្រីបានសង្កត់ធ្ងន់លើចំណុចគន្លឹះសំខាន់ៗ រួមមាន៖
- តម្លៃមិនអាចខ្វះបាននៃព័ត៌មានពិត៖ បើទោះបីជាប្រព័ន្ធផ្សព្វផ្សាយទំនើបមានភាពរហ័សរហួន ប៉ុន្តែប្រព័ន្ធផ្សព្វផ្សាយបុរាណដូចជា វិទ្យុ ទូរទស្សន៍ និងកាសែត នៅតែជាបង្អែកដ៏រឹងមាំក្នុងការផ្តល់ព័ត៌មានពិត និងជាប្រភពផ្លូវការសម្រាប់ប្រជាពលរដ្ឋ ជាពិសេសក្នុងស្ថានភាពដែលត្រូវការការផ្ទៀងផ្ទាត់ភាពត្រឹមត្រូវ។
- ការងាកមករកវិជ្ជាជីវៈសារព័ត៌មាន៖ បច្ចុប្បន្ន សាធារណជនចាប់ផ្តើមប្រែឥរិយាបថពីការជឿជាក់លើព័ត៌មានតាមបណ្តាញសង្គមដែលខ្វះប្រភពច្បាស់លាស់ មកស្វែងរកប្រភពព័ត៌មានដែលមានវិជ្ជាជីវៈត្រឹមត្រូវវិញ។ នេះគឺជា “ឱកាសមាស” សម្រាប់ស្ថានីយវិទ្យុក្នុងការដណ្តើមទីផ្សារ និងរក្សាប្រជាប្រិយភាពរបស់ខ្លួន។
- ការធ្វើទំនើបកម្ម និងការបន្ស៊ាំខ្លួន៖ ស្ថានីយវិទ្យុចាំបាច់ត្រូវធ្វើការកែប្រែទម្រង់ផ្សាយឱ្យស្របតាមយុគសម័យឌីជីថល។ ការមិនព្រមផ្លាស់ប្តូរឱ្យទាន់សម័យកាល នឹងធ្វើឱ្យស្ថានីយប្រឈមនឹងការបាត់បង់ការគាំទ្រ និងការផ្សព្វផ្សាយពាណិជ្ជកម្ម រហូតដល់អាចឈានទៅរកការបិទបាំងប្រតិបត្តិការ។
ជាទីបញ្ចប់ ឯកឧត្តមរដ្ឋមន្ត្រី នេត្រ ភក្ត្រា បានរំលឹកថា វិទ្យុនៅតែជាមូលដ្ឋានគ្រឹះដ៏សំខាន់ក្នុងការចែកចាយព័ត៌មានទៅដល់គ្រប់ច្រកល្ហក និងផ្តល់នូវទំនុកចិត្តខ្ពស់ដល់មហាជន ដែលជាអ្វីដែលប្រព័ន្ធផ្សព្វផ្សាយអនឡាញមួយចំនួនមិនអាចផ្តល់ជូនបាន៕
ដោយ៖ ហុក វិបុល