លោកជំទាវបណ្ឌិត បាន ស្រីមុំ អញ្ជើញបញ្ចុះបឋមសីលា សាងសង់រង្វង់មូលថ្មី «រូបសំណាកព្រះវិស្ណុ» នៅក្រុងប៉ៃលិន

លោកជំទាវបណ្ឌិត បាន ស្រីមុំ អញ្ជើញបញ្ចុះបឋមសីលា សាងសង់រង្វង់មូលថ្មី «រូបសំណាកព្រះវិស្ណុ» នៅក្រុងប៉ៃលិន
ប៉ៃលិន៖ នាព្រឹកថ្ងៃទី១២ ខែមីនា ឆ្នាំ២០២៦ រដ្ឋបាលខេត្តប៉ៃលិន ដឹកនាំដោយ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន អមដំណើរដោយថ្នាក់ដឹកនាំមន្ទីរ អង្គភាពជុំវិញខេត្ត បានអញ្ជើញប្រារព្ធពិធី បញ្ចុះបឋមសីលា សាងសង់រង្វង់មូលថ្មីបន្ថែម «រូបសំណាកព្រះវិស្ណុ» នៅលើដងផ្លូវជាតិលេខ៥៧ ត្រង់ចំណុចផ្លូវបំបែកជាបួន ក្បែរវត្តអូរច្រា ស្ថិតក្នុងសង្កាត់ទួលល្វា ក្រុងប៉ៃលិន។
គម្រោងសាងសង់រង្វង់មូលនេះ មានគោលបំណងលើកកម្ពស់ សោភ័ណភាពទីក្រុង និងជួយសម្រួលដល់ ការធ្វើចរាចរណ៍ ព្រមទាំងកាត់បន្ថយ និងបញ្ជៀសគ្រោះថ្នាក់ចរាចរណ៍ ដើម្បីធានាសុវត្ថិភាពក្នុងការធ្វើដំណើររបស់ប្រជាពលរដ្ឋ។
ក្នុងឱកាសនោះ លោកជំទាវបណ្ឌិត បានមានប្រសាសន៍ថា ក្រោម គោលនយោបាយឈ្នះ–ឈ្នះ និងការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន ប្រធានព្រឹទ្ធសភា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើឱ្យប្រទេសកម្ពុជា ទទួលបានសុខសន្តិភាពពេញផ្ទៃប្រទេស មានស្ថេរភាពនយោបាយ និងការអភិវឌ្ឍលើគ្រប់វិស័យ។
លោកជំទាវបណ្ឌិតបានបញ្ជាក់ថា ខេត្តប៉ៃលិន ដែលជាខេត្តជាយដែន និងធ្លាប់ជាសមរភូមិកាលពីអតីតកាល បច្ចុប្បន្នបានមានការអភិវឌ្ឍ និងរីកចម្រើនយ៉ាងគួរឱ្យកត់សម្គាល់ លើគ្រប់វិស័យ ហើយជីវភាពប្រជាពលរដ្ឋក៏កាន់តែប្រសើរឡើងពីមួយថ្ងៃទៅមួយថ្ងៃ។ លោកជំទាវបណ្ឌិតបន្ថែមថា នៅពេលរង្វង់មូលនេះសាងសង់រួចរាល់ នឹងជួយសម្រួលដល់ការធ្វើចរាចរណ៍ និងកាត់បន្ថយគ្រោះថ្នាក់ចរាចរណ៍ដែលធ្លាប់កើតមានជាញឹកញាប់នៅចំណុចផ្លូវបំបែកជាបួននេះ។
ជាមួយគ្នានេះ លោកជំទាវបណ្ឌិត បាន ស្រីមុំ ក៏បានអំពាវនាវដល់ប្រជាពលរដ្ឋទាំងអស់ សូមចូលរួមគោរពច្បាប់ចរាចរណ៍ និងរួមគ្នាថែរក្សាទ្រព្យសម្បត្តិសាធារណៈរបស់រដ្ឋ។ លោកជំទាវក៏សំណូមពរឱ្យប្រជាពលរដ្ឋមេត្តាយោគយល់ និងអធ្យាស្រ័យចំពោះផលប៉ះពាល់អាចកើតមានក្នុងអំឡុងពេលសាងសង់ ព្រមទាំងចូលរួមសហការជាមួយក្រុមការងារបច្ចេកទេស និងអាជ្ញាធរមូលដ្ឋាន ដើម្បីឱ្យគម្រោងនេះអាចសម្រេចបានតាមផែនការ និងឆាប់បានប្រើប្រាស់ជាផ្លូវការ។
ជាមួយគ្នានេះ ប្រជាពលរដ្ឋនៅក្នុងមូលដ្ឋាន ក៏បានបង្ហាញនូវសេចក្តីត្រេកអរយ៉ាងខ្លាំង និងថ្លែងអំណរគុណយ៉ាងជ្រាលជ្រៅ ចំពោះលោកជំទាវបណ្ឌិតអភិបាលខេត្ត និងថ្នាក់ដឹកនាំគ្រប់ជាន់ថ្នាក់ ដែលតែងតែយកចិត្តទុកដាក់គិតគូរពីសុខទុក្ខរបស់ប្រជាពលរដ្ឋ ជាពិសេសការធានាសុវត្ថិភាពក្នុងការធ្វើដំណើរ និងការកាត់បន្ថយគ្រោះថ្នាក់ចរាចរណ៍នៅលើដងផ្លូវ៕
ដោយ៖ អ៊ុក ទូច