ឯកឧត្តម ហ៊ុន ម៉ានី និងឯកឧត្តម ឃួង ស្រេង អញ្ជើញជាអធិបតីក្នុងពិធីដង្ហែព្រះពុទ្ធប្បដិមា និងស្រង់ព្រះ ក្នុងព្រឹត្តិការណ៍ «នគរសង្ក្រាន្ត» នៅវត្តភ្នំ

(ភ្នំពេញ)៖ នាព្រឹកថ្ងៃទី១៦ ខែមេសា ឆ្នាំ២០២៦ ដែលត្រូវនឹងថ្ងៃវារៈឡើងស័កនៃពិធីបុណ្យចូលឆ្នាំថ្មីប្រពៃណីជាតិខ្មែរ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) រួមជាមួយ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញជាអធិបតីក្នុងពិធីដង្ហែព្រះពុទ្ធប្បដិមា និងស្រង់ព្រះ ក្នុងក្របខណ្ឌនៃព្រឹត្តិការណ៍ «នគរសង្ក្រាន្ត» ឆ្នាំ២០២៦។

ពិធីនេះបានចាប់ផ្តើមដោយការដង្ហែព្រះពុទ្ធប្បដិមាពីវត្តឧណ្ណាលោម មកតម្កល់លើបុស្បុក និងធ្វើពិធីស្រង់ព្រះនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ដើម្បីលាងជម្រះនូវបាបកម្ម និងគ្រោះចង្រៃទាំងឡាយពីឆ្នាំចាស់ ព្រមទាំងទទួលយកនូវពរជ័យ សិរីសួស្តី និងសេចក្តីសុខក្សេមក្សាន្តក្នុងឆ្នាំថ្មី។

ចំណុចសំខាន់ៗនៃព្រឹត្តិការណ៍៖

ទឹកមន្តស័ក្តិសិទ្ធិពីភ្នំគូលែន៖ លោកតាអាចារ្យនៃគណៈកម្មការរៀបចំបានឱ្យដឹងថា ទឹកមន្តដែលប្រើប្រាស់ក្នុងពិធីស្រង់ព្រះនេះ ត្រូវបាននាំយកមកពីភ្នំគូលែន ដែលជាភ្នំដ៏ពិសិដ្ឋ។ កិច្ចនេះធ្វើឡើងដើម្បីបួងសួងសុំសេចក្តីសុខសន្តិភាពដល់ប្រទេសជាតិ ប្រជាពលរដ្ឋ និងជាពិសេសដើម្បីឧទ្ទិសពរជ័យដល់វីរកងទ័ពដែលកំពុងឈរជើងការពារបូរណភាពទឹកដីនៅជួរមុខ។
ការអប់រំតាមរយៈពិធីសាសនា៖ ក្រៅពីការស្រង់ព្រះនៅវត្តអារាម ពុទ្ធបរិស័ទក៏ត្រូវបានរំលឹកឱ្យធ្វើពិធីស្រង់ព្រះរស់នៅឯផ្ទះផងដែរ ដែលមានដូចជា ឪពុកម្តាយ និងចាស់ព្រឹទ្ធាចារ្យ ដើម្បីបង្ហាញនូវកតញ្ញូតាធម៌ និងការជួបជុំក្រុមគ្រួសារដ៏កក់ក្តៅ។
ជោគជ័យនៃ «នគរសង្ក្រាន្ត»៖ ព្រឹត្តិការណ៍នគរសង្ក្រាន្តដែលរៀបចំដោយ ស.ស.យ.ក. សហការជាមួយរដ្ឋបាលរាជធានីភ្នំពេញ មានរយៈពេល ៦ថ្ងៃ (ពីថ្ងៃទី១៤ ដល់ ១៩ មេសា)។ ក្នុងឆ្នាំនេះ គេសង្កេតឃើញមានមហាជន និងយុវជនចូលរួមយ៉ាងច្រើនកុះករលើសពីការរំពឹងទុក រហូតដល់រាប់ម៉ឺននាក់។
សន្តិសុខ និងសណ្តាប់ធ្នាប់៖ ក្រោមការដឹកនាំផ្ទាល់របស់ឯកឧត្តម ឃួង ស្រេង អាជ្ញាធរមានសមត្ថកិច្ចបានរៀបចំសន្តិសុខ សណ្តាប់ធ្នាប់ និងការមើលថែយ៉ាងដិតដល់ ដែលបង្កលក្ខណៈងាយស្រួលដល់ប្រជាពលរដ្ឋ និងភ្ញៀវទេសចរបរទេសឱ្យដើរកម្សាន្តប្រកបដោយភាពសប្បាយរីករាយ និងសុវត្ថិភាពខ្ពស់។

សូមបញ្ជាក់ថា ក្នុងព្រឹត្តិការណ៍នេះមានការបង្ហាញទស្សនីយភាពវប្បធម៌ សិល្បៈ និងសាសនាធំៗជាង ២០កម្មវិធី ព្រមទាំងមានការតាំងបង្ហាញផលិតផលខ្មែរ និងឆាកប្រគំតន្ត្រីចំនួន ៣កន្លែងផ្សេងគ្នា ដើម្បីអបអរសាទរឆ្នាំថ្មីឱ្យកាន់តែអធិកអធម៕

អត្ថបទដោយ៖ លោក ហុក វិបុល (០៩៧ ៤២១ ៦៦៦១)

សារព័ត៌មាន៖ ពន្លឺព្រះធម៌